話說，好多團有時剩係會包入場費，要玩機動遊戲，就要加多d錢買套票，分別係3個遊戲或5個遊戲，當然買多d就貴d啦！加上有時佢要你指定時間集合，玩唔哂又會好浪費。

樂天世界︰（由於太多玩唔哂，唯有將我知既講俾大家聽）

主要分室外同室內，室外既遊戲我覺得刺激d，必玩係「阿特蘭大」，即係話「死過人」既過山車，但大家唔使擔心，因為上次係員工自已玩，以為自已友，所以唔幫佢check安全帶，實際上你跟足黎做就無問題。離心力超勁，同埋夠快，如果真係想玩，唔該先玩呢個，因為條隊勁長...（我排左30分鐘）

其次係跳樓機，雖然我無玩，但係人地快一上到去就即刻落返黎，想尖叫都叫唔切...（排10分鐘左右）

跟住係空中洗衣機，由於小妹玩唔到fing下fing下既機，所以唔敢玩，但佢地話都拍得住「阿特蘭大」（排30分鐘）

至於室內，必玩既係海盜船，因為真係無乜刺激野玩，加上架船係對住間酒店住房窗口，可以會睇到d攪笑野，例如見到大肥佬換衫（排15分鐘，因為架船都幾大）

其次可以玩下法老王，但係真係唔好抱咁大期望，不過由入口行入去都好靚，我諗你映相都可以映半個鐘（無乜人排隊）

跟住亦都可以玩下室內過山車，但得個暈字（5-10分鐘）

至於拖友，梗係要玩「天國的楷梯」既木馬啦！而場內亦都有好多為情侶而設既映相場景，如果女朋友唔玩機動遊戲，大家大可以大映特映，因為室外到左晚上會亮燈泡，成個城堡都好靚。

最最最把鬼係個激光表演，因為所有機動遊戲係會暫停，諗住會好正，但太長，好鬼悶，大家可以睇三分鐘後到你想玩既機動遊戲排定隊，因為完左激光仲有少少時間俾你玩至關門。

紀念品一般，價錢都唔平，無乜特別食品。

愛寶繽紛樂園︰

超唔夠時間玩，可能星期日去既原故，所以每樣野都排起碼30分鐘。

排得最癲係野生動物園，排成個幾鐘，但如果有小朋友，都係無得走，小朋友必睇。

園內有兩個過山車，兩個都係麻麻地，分別係普通過山車及飛鷹過山車。

有一個較為特別既係索道，既係坐係槐滑板玩超長滑梯，好似人地冬季奧運會咁。另一個係吊車，因為吊吊fing都幾得人驚架。

如果你唔怕濕既話，可以玩水上圓艇，幾個人一齊坐，我就玩到對波鞋濕哂...不過d工作人員勁有enrgy，成鬼日整古做怪，當做show俾排隊既人睇。

必睇巡遊，相對唔刺激既過山車，我prefer睇巡遊，同埋紀念品都幾靚，比樂天無咁貴，同埋佢d建築都好cute可以映下相，食品一般。

由於兩個樂園我都係玩半日，所以真係唔夠時間，愛寶繽紛樂園買big3就可以，樂天你博既話都可以玩到5個既。

（相片仍在處理中，有待公佈）