香港新浪網 MySinaBlog
« 上一篇 | 下一篇 »
PigFarm | 5 September, 2006 | 我的專業工作 | (1379 Reads)
你知啦!做我地呢行,成日都會接觸到唔同既人,唔同既專業,都幾得意架.....

第一次既真正接觸,係我有個朋友係警校畢業,我地成班去左捧佢場,其實我地唔係好信佢做到警察,因為佢讀書既時候係一名淘氣王,無老師唔識佢,大家都好擔心,唉!警隊蒙上一個污點....

點知大家跌哂眼鏡,係畢業禮既時候,我差d喊左出黎,佢真係成個人唔同哂,好開心可以見到佢長大左、成熟左。第一次係感動既.............

第二次,今次開始係工作關係,有幾個靚仔犯事俾警察啦左,事後同佢地見律師呀、上庭呀咁,你知啦!d靚仔一定會話你係衰人,正所謂「難為正邪定分界」,成日就話人地做佢呀咁,有時都好難做,到上庭既時候,其中一個警察做証人,但當律師問佢問題時,可能因為時間隔得太耐,唔記得左,佢就要求睇返本簿仔,點知俾個法官鬧,之前做咩唔睇,結果係點?你都估到啦........

第三次,poly攪左個trainning,我以社工既身份出席,呢一個trainning係俾警察同埋社工,等大家互相了解一下對方既工作。開始由幾位講者開始,大家再做下分組討論,其中有一個環節,係分享下大家係對方心目中既形象,火藥味就開始黎啦,佢地會覺得社工有時明知班靚仔係做錯,又唔出聲,知情不報,又攪呢樣、又攪果樣,而社工梗係會覺得有時有部分警察會不公平對待,例如蝦個靚仔唔識或者驚,要佢簽口供紙,不過,大家同時會講返自己立場,社工一定唔會教靚仔講大話,亦都會同佢分析個後果會係點,而社工亦都唔會講大話,但某程度既私隱係有,如果涉及到生命安全既,我地都會有例外,而警察既立場亦都好鮮明,有犯事就有犯事,唔係邊個人認為佢有問題,所有結果交由法庭處理,而警方亦都不停建立唔同既機制去監管返警隊,當然最後都係完滿既完成啦!

第四次,又係有靚仔犯事,今次去差館睇佢,去到差館,個阿sir已經好好人,即刻拉我埋一二邊講,因為個靚仔其實精神有問題,佢地去到佢屋企,就知佢個屋企有幾複雜,問我知唔知,想我幫下佢地,不過唔係話有思覺失調就可以犯事,有病既就入醫院治療,呢個我都明白,因為手續時間好長,而阿sir又知我原本放緊假,又問我食左飯未,又俾朱古力我食,不過我俾左個靚仔食,個阿sir見到咁,又問︰「你俾哂佢呀?你自己呢?」,跟住又摷櫃筒,「我仲有d花生呀...」好有人情味既一間差館....最慘係,到保釋啦!個靚仔唔夠保釋金,個阿sir就走去到上司講,因為情況特殊,阿sir話︰「真係破天荒大減價,平到你唔信,都無試過...」真係好感激個阿sir............

第五次,去旅行,遇到兩個警察family,佢地個小朋友勁Q勁好玩,所以同佢地熟左,返到黎香港都有contact架。其中有一晚,去左佢地間房食宵夜傾計,講下講下,有一個問我,點解社工成日叫d人去遊行呢?有時有d仲擾亂社會秩序,例如訓街呀、唔俾阿局長、紳士架車行呀咁,究竟你地點諗架呢?唔可以用其他方法既咩?問到我有d驚,但都會答返佢地,唔係個個社工都攪遊行既,有時唔係我地唔想用其他方法,而係都試過無用,先至用呢個方法姐,你估我地唔煩咩,又要申請、又要報警,而且遊行參與既人數多,人既質素唔係我地操控既範圍,可能有人會突然過激,但我地都唔想發生既,而且攪遊行既未必一定係社工,有議員呀咁,有少部分無良既議員,有時遊行係宣傳方法既一種,不過都係果樣野啦!有時我地會諗點解d人要自殺呢?我相信佢決定果一刻,佢真係好痛苦好唔開心,而點解要遊行?因為真係其他方法都唔可以反映到我地既要求、需要時,呢個係我地最後一步,有時可能都知道未必可以改變到d咩,但起碼我試過、我盡過力,亦都話俾其他人聽件事情,不過,我唔係所有遊行都支持,睇下係d咩。

 


[1]

好長篇...好深奧...我有D睇唔明,不過都有睇晒,哈哈哈!佩服妳的專業^^


[引用] | 作者 珊地 | 05 September 2006, 13:10 | [舉報垃圾留言]

[2]

邊度唔明呀?


[引用] | 作者 小社工 | 07 September 2006, 15:37 | [舉報垃圾留言]